Lütt beteb Platt mit 't Abendblatt

Schenken is scheun! Un dat mutt nich düür sien. "Wat von'n Harten kummt, dat geiht to'n Harten", is en oll wohr Woort. Wenn dien Dochter, wenn dien Söhn di en Bild moolt oder wat snittjert hett, denn freist du di; dat Kind mutt doch nix keupen, sien Taschengeld utgeben (wenn't dat al kriggt). In dat Bild, in dat snittjert Stück, dat jo heemlich mookt worrn is, dor sünd de goden Wiehnachtswünsch for Vadder oder Modder mit binnen. Du weetst doch ok noch von freuher, dat du bi so'n heemlich Doon bibbert, en goot Versteek utdacht hest, denn ok stolt west büst.

Du freist di ok, höögst di, smuusterst villicht, wenn dien Dochter di en poor Strümp oder en Stirnband strickt hett (doch, sowat gifft dat wedder), oder wenn dien Söhn di in'n Bastelkrink en lütt Küssen neiht hett, wo he en Steern, en Engel oder en Bloom opdrückt hett (jo, sowat mookt se); villicht müssen de beiden en beten Wull, en beten Dook, en beten Tüügfarv keupen, - ober dat mutt nich düür sien. - Un wenn du dat Book un de CD for dien Froo, se de Kassett' un dat Nokixel (Lexikon) for di kofft hett, dat's ok nich so düür as mennigwat, wofor'n deep in'n Bütel griepen mutt. Je weet, wat ji geern möögt, un dat kummt ünnern Dannenboom. -

Mien Nober speelt bannig geern, wat ok ümmer. Spelen is for em dat Scheunste von lütt op an. Wat schenkt sien Froo em woll to Wiehnachten? Kloor, jichenseen nee Speel! Se hebbt twee Kinner, Jungs, teihn un dorteihn Johr oolt. Wat mookt de woll geern? Richtig, spelen!

Wenn bi jem Hillig-obend de ollere Söhn wat op'e Fleit vorspeelt, de jüngere en Gedicht opseggt hett, se alltosomen wat sungen hebbt, Bescherung un Kantüffelsaloot - (mit Wuß) Eten vorbi is, denn ward speelt. Natürlich eerst (oder ok blots) mit dat Speel, dat Vadder nee kregen hett: "Siedler" oder "Malefiz" oder "Rummikub" oder "Monopoly" (Utgoov: Hamburg!). Oh jo, Monopoly! De Jüngst gifft de Stroten un Hüüs ut, de Öllst hett de Kass', un denn geiht't mit Hurra un de Wörpels los. Tjä, un wokeen kann denn op de Unnastroot oder gor op de "Elbchaussee" en Huus boon? Wiehnachten . . .