Gott und die Welt
Wenn'n oller ward, kriggt'n so'n Ohnen von de T i e t. Se ward di düütlich, se geiht ümmer gauer, un du markst ümmer beter: Fasthollen kann'n ehr nich! D a t is woll in de oll Seggwies mit meent vonwegen: De Tiet, de flüggt as Snee vor de Sünn!
Jo, du kickst geern trüch, wenn du oller warrst, trüch in de freuhen Johren, as de Tiet di noch keen Problem west is . . .
Wenn dat Freuhjohr komen weer, wenn Bäum un Büscher langsoom greun warrn wullen, denn gung't in uns Stroot in Eimsbüttel ümmer los mit de Spele: Messerstick, Marmeln, Hinkepoot, Himmel un Höll', mit Abo Bibo un Geschichtenball . . .
Weern denn en poor Weken in't Land gohn, denn spelen wi "Blädergreun" (Blättergrün). Dor kunnst bi winnen un verleren! Een trock denn op'n mol en greun Blatt ut de Tasch un sä to den Macker: "Blädergreun, Blädergreun, stop - stop - stop, een - twee - dree, Glückspaket!" De anner müß en greun Blatt bi sik hebben un vorwiesen könen, anners harr he verloren un müß en Glückspaket packen un hergeben; dor kunn en Lolly binnen sien oder Biller ut Zigarettenschachteln (Filmdiven oder Ligaspelers!), villicht ok mit'n "Ditscher" (en iesern Marmel).
Oppassen müß'n ok, dat'n ümmer en frisch greun Blatt in de Tasch harrn; so'n dreugen Kroom, de al krömeln wull, worr nich estermeert, - dor geev't denn licht mol beten Striet öber . . .
Weer dat Freuhjohr denn richtig in de Gangen, denn holl dat mit "Blädergreun" ratz op; denn geev't mehr Kriegenspelen oder Klumpenversteek (mit Deerns tosomen!) oder "Von Boom to Boom".
Woans de Tieden ok weern domools - oftins leeg genoog! - wi hebbt in uns Stroot fein speelt mitenanner. Jo, dat is lang her, man dat weer en Band un bleev en Band. Ok wenn an de oll Seggwies natürlich wat an is: De Tiet, de flüggt as Snee vor de Sünn, oder: De Tiet loppt hen, as de Wind henweiht.
Wenn dat Greun in't Freuhjohr dor is, denk ik noch mennigmol: "Blädergreun - Blädergreun, stop - stop - stop . . ." Un wo is't nu mit en Glückspaket, Lüüd?