To veel lesen un tolehren is nich ümmer goot, besonners wenn du wat von de Püschologen to weten kriggst: Minsch, wat de allens ünnerseukt! Dor heff ik leest, ingelsche Püschologen hebbt 1200 Lüüd Bontjes eten loten, üm wat ruttofinnen! Wat mookt de Minschen mit den seuten Snabbelkroom in de Snuut? Un do hebbt se rutfunnen: So as een en Bontje itt, so i s de ok, dor kann'n sein Oort unn Charakter an rutkennen!

Dree grote Gruppen gifft dat, de goht de Bontjes ganz verscheden an: Dor sünd toeerst de "Lutschers"; de loot den Bontje suutje getuutje lütter warrn un hebbt dor veel von. Denn gifft dat de "Knauers", de nuckelt dor man eben op rüm, denn biel se mol un nochmol un freit sik öber den vullen Mund vull Bröckelskrooms un kaut dat denn toenn. Un de drütte Grupp, dat sünd de "Brekers", de haut dor glieks so knasch rin mit de Tähn un terbiet un terbreekt den Bontje ruffruff, dat se dor gau von af sünd.

Na goot, dat de Lüüd ehr Mardelbontjes un Drops so verscheden eet, da hett'n jo al wußtober de Püschologen hebbt wat rutfunnen: De "Lutschers", dat is en ruhigen Slag, dor kannst Vertroon to hebben, blots so dull lebennig sünd se nich! - De "Kauers" sünd Optimisten, sünd geern op de Sünnensiet von't Leben - ik ok, ober ik lutsch! -, blots se freet en beten veel un hebbt sik nich recht an'n Tögel. Un de "Brekers", wohrschoo! Dat sünd so'n Gluupsche, de denkt dor nich veel öber no, wat se doot; bi de kummt allens rumsbums ut'n Gefeuhl, mit de is swoor leben! Minsch un Mannomann, de Püschologen hebbt mi nu richtig de Roh nohmen: Ik kann keenen mehr Bontjes eten sehn, ik stempele m in Gedanken glieks af: Lutscher-Kauer-Breker! Un ik heff jo tolehrt: Dor kannst Vertroon to hebben, is obern nich recht lebennig, - dat is en ollen Dickfreten - un dat is en willen Hen-un-Her!

Nee, düsse Oort Püschologie mookt nerveus, verdarft di de Freid bi't gemeensoom Bontjeeten, un du froogst di ümmer: Wat is dat for een oder ene: dien Froo, dien Tant, dien Söhn, dien Dochter, din Früd, dien Gast, dien Nobersche: Lutscher, Kauer, Breker, Lutscher, Kauer, Breker?!