Freedag dreep ik bi Klock fief rüm dree Sportfrünnen an'n Bohnhoff. "Halloh", sä ik, "hebbtji hüüt obend wat vor? - Bi Peter Bumann is üm Klock söben Priesskaat; koomt ji mit?" "Jo, dor heff ik Snuten to", sä Willi. "Dat's wat for mienen Vadder sien Söhn!" sä Hannes. "Un wat gifft't to winnen?" freug Udo. "Na, poor Göös, Kaßler, Mettwüß, Buddel Sluck mit düt un dat. Ji speelt jo goot. - Also ran!" Jo, se wullen mitmoken, müssen ober ehr Froons noch anropen; dat weer blots for Udo en beten swoor, denn egentlich wullen se in'n Kinpott! "Ik bring ok wat Feines for Sünndas mit", sä he. "Vertöörn blots Fortuna nich," sä ik to Udo,"de vorher rekent, mutt tweemol reken!"

"Oh, ik kann Skaatspelen, Günner; dat hest du doch oft noog markt!" Un würklich: As dat Spelen kott no söben anfungen harr, weer an Udo sienen Disch glieks veel Larm un Leben, so: "Dat gifft't jo woll nich, de hett al wedder en Grand!" Un: "Hest du en Sott, Udo! Hest du de Söög an'n Buuk kettelt?" Un: "Jo, jo, du hest wunnen, mit 61; man wi weet jo: Gott is mit de Dummen!"

Werner lepen de Koorten üm, as'n so seggt; no teihn Spele weer he al op 340 Gode weglopen. Man dennworr he lichtsinnig, verspeel tweemol, un denn kreeg he keen Blatt mehr. As sien Disch bi Klock twolf rüm fardig weer, stöhn he: ,Siet Klock negen heff ik jo woll Schiet an de Finger hatt, - mickerige 390 no 60 Spele, Mannomann!" Dor kunnen sik de annern bannig an högen, weetst jo, de den Schoden hett . . .

Wi annern dree harrn ganz gode Koorten hatt un ok vorsichtig speelt un töben nu in dat lustig-drängelige Mannsgewöhl rund den Disch mi de Priesen op uns Gewinntall. Peter Bumann harr de List in de Hand un reep ut: "- drütte Pries 912 Gode Hugo Reimers, soch di en Goos ut! - 902 Gode Guschi Pink, veer Pund Kaßler, - 870 Hinzmann, en Mettwurst un en Gootschien for'n Wiehnachtskarpen . . ."

Wi dree trocken dor en Kirschwoter, en Oont un en Mettwust an Land, uns Werner stunn dorbi un keek de Näs lang. Wi grienen em an: "Kannst jo morgen fröh dree Wüst for Sünndag köpen!" "Ji köönt mi mol - !" schimp he, un denn gung he en Junggesell an, de sull em sien fiev Pund Karbonood verköpen. "Mientwegen", sä de, "wat sall ik dormit. 15 Euro, un denn giffst noch enen ut an de Theek."

Wenn'n allens tosomenrekent, hett Werner den Obend woll so 40 Euro utgeben. Ober: Se harrn jo Sünndag den feinen Broden, sien Froo harr Huusstandsgeld spoort, un de Kinner weern stolt op ehren Vadder: So'n leckern Pries! Jo, ehr Vadder, de kann Skaatspelen!!!