Lütt beten platt

Op uns Nobers, du, dor köönt wi uns op verloten! Wenn dor mol wat sien sull, mit Füür oder Inbrekers oder een is hier ümfullen un kann sik nich mehr reugen . . . Dat duurt wiss nich lang un se sünd dor un kiekt no.

Se kiekt jo ok so ümmer no un weet von allens Bescheed. Wat wi Post kregen hebbt oder de Paketwogen hett hier hollen, wat du so driggst an oolt oder nee Tüüg, wat een von uns utgohn deit un bannig loot trüchkummt.

Un ok so'n Soken as: Nee, de Deern harrn se hier noch nümmer sehn in de Stroot, doch, ganz snuckelig, ober woll doch keen - ha, ik meen doch man, weetst wull . . . Un dien Auto hebbt se op'n Kieker, wat de woll verbruukt, jo, wegen dat Luftverpesten un so, un de kunn geern mol öfters wuschen warrn.

Un uns Goorn is so wiet ganz nett, hett mol een meent; man müss ober eher meihn, un Bäum mit Stammdorchsnitt öber 14 cm, de droff'n nich mehr ümhauen. Dor kann anners licht mol een von't Bezirksamt komen un en Geldstroof kassieren. Wi wüllt dat hier doch greun behollen, haha, nich politisch. Woso de dor nu op koomt, weet ik nich.

Ik weet nich ümmer, wat de meent. Man de wüllt dat ok ümmer kloorbegen: Wi feegt doch ok tosomen hier Snee, passt op, dat keen Solt mehr streit ward un Goornaffall nich mehr in en Mülltunn kummt.

De Nobers hebbt ümmer wusst, wat uns Söhns in'n Sport schafft harrn, un se hebbt wohrschoot, as uns Broderdochter mit so'n - na, ik ok egool, dat is bald wedder ut west. Na, dat Wohrschoon hebbt se woll goot meent.