Hamborg. Dusenden vermeedt ehr Tohuus öber Internet-Portolen as Airbnb an frömme Lüüd. Ok Logerruum geiht per Klick weg.
Wo de Mieten stiegt un stiegt, hebbt jümmer mehr Hamborgers plietsche Ideen, mit jümehr Wohnungen noch en beten Geld dorto to verdenen. Mol mookt se dat so as fröher al, wenn se enkelte Stuven ünnervermeden doot. Ober in de letzten Johren gifft dat noch mehr Mööglichkeiten un dorbi löppt ok veel öber’t Internet.
Dat Portool, dat al veel Lüüd kennt, is Airbnb. Öber düsse Siet köönt Privootlüüd jümehr Wohnung oder Delen dorvun an reisen Lüüd vermeden. Dat Angebott is gewaltig: vun’t Sloopsofa in Horborg för 12 Euro de Nacht bet hen no Wohnungen mit veer Stuven in Winterhud för 280 Euro. Un de Tall vun
Lüüd, de sowat anbeden oder annehmen doot, wasst stüttig. Alleen 2015 sünd so in Hamborg knapp twee Millionen Betten in 4562 Privootquarteern öber Portolen as Airbnb, Wimdu oder 9flats verhüert worrn. De op düsse Oort un Wies Geld verdenen will, schull ober leber vörher bi en Mietervereen nofrogen. Denn nich in jeden Fall dörf een eenfach so an Touristen vermeden.
To lütt dörf de Wohnung ober nich ween
Anners süht dat ut mit Ünnermeedverdräg, as dat de in Dusenden vun Hamborger Wohngemeenschoppen gifft. Wenn een den Vermeder Bescheed seggt hett, kann een enkelte Stuven oder ok de ganze Wohnung ünnervermeden un de Kostenlast so op mehr Schullern verdelen. Weniger bekannt is betto woll de Mööglichkeit, ok Platz op’n Böhn oder in’n Keller an anner Privootlüüd to vermeden. Op de Siet www.shelfsailor.de stoht al de Nooms vun de eersten Hamborgers, de so Stauruum, den se sülbst nich bruukt, to Geld moken wüllt.
Mehr inbringen deit wat anners. Dat is ober nich so’n seker Geschäft. Dusende vun Hamborgers mookt ehr Tohuus för Film-Opnohmen, Foto-Shootings oder Werbe-Spots free. Alleen in de Dotenbank vun de Firma Motivbuero steiht en List mit opstunns bummelig 3000 Wohnungen un Hüüs ut Hamborg un ümto. „Sünnerlich för Minschen mit grote un gerümige Wohnungen kann düsse Mööglichkeit interessant ween“, seggt Motivbuero-Geschäftsföhrersch Karin Verbeek. Sleit dor denn wohrraftig een to, denn brummt dat richtig in de Kass. So üm un bi een Nettokooltmeed köönt Meders in’n Snitt för een Dag frömme
Lüüd in’t Huus verlangen. Is de Immobilie grötter oder en Villa oder Loft, kann dor ok noch mehr bi rutspringen.
To lütt dörf de Wohnung ober nich ween. De Film-Gäng bruukt ja ok Platz. Un an’n leevsten schall de Wohnung in’n eersten Stock oder Parterr liggen. Wenn nich, denn mutt dor tominnst en Lastenfohrstohl ween.
