Wi sünd ja dit Johr to Wiehnachten nich tohuus. Wi sünd in London bi us grode Dochder un ehr Familie. Toeerst keem mi disse Ploon ja gediegen vör. Siet Johrteihnten fiert wi Wiehnachten tohuus, un nu schall dat opmol anners ween?

Overs wi hefft ook jümmers seggt: Fiert ward dor, wo de lüttsten Kinner sünd, un de sünd nu mol in England. Wo länger ick dor över nodenk, wo beter gefallt mi dat ook mit London. Un weeßt ook, worum? Wiel ick dor een Barg Geld mit spoorn do. Eerstigmol bruukt wi ja kienen Wiehnachtsboom. Wi koomt an'n tweden Wiehnachtsdag retour, denn lohnt dat nich mehr. Denn fallt ja ook dat grode Wiehnachtseten ut.

Mien Familie steiht ja op Wild to Wiehnachten, un ick mööt Jo ja nich vertellen, wat Wild kosten deit. Dit Johr kriegt wi ja in London wat vörsett. Ook bi de Geschenken geiht dat dit Johr ja nich so in't Pottmonnee. Mien Swegeröllern t. B., de seht wi erst in't neje Johr. Denn is Wiehnachten lang vörbi. Nix mit groden Bildklenner för Oma un düren Cugnac för Opa. Ook för mien Süster un ehrn Söhn mööt wi nix inkopen. Wiehnachten fallt ut. Goot, Novers Jessica, de use Hunnen utföhrt, de schall nich leer utgohn. Overs de Müllkutschers - deit mi Leed. De Zeitungsutdräger un de Postbüdel - na ja, viellicht to Sylvester. Doch Wiehnachtssteerns för de Noverschen links un rechts - nix. Un ook wenn de Keerl von den Zirkus 'n Dag vör Wiehnachten bi us pingeln deit - wi sünd nich dor.

Un up kienen Fall schickt wi wedder Blomenstruuß mit Fleurop no Tant Else in Wilhemshoven. Nee, de roopt wi an'n Wiehnachtenovend ut London an. "Tant Else? Jo, wi sünd dat, ut London. Jo, England. Wat? Of dat düür is antoropen? Och, dor mookt di man kien Gedanken um. Dat büst du us all weert. Frohe Wiehnachten. Tschüs!" Of dat düür is? Hahaha. Weet ick nich, is ja dat Telefon von mien Dochder. Kost mi up jeden Fall nix. Ick freu mi al so up Wiehnachten, denn dat ward ja för mi en echt Spoor-Fest. Dat heet, wenn ick de Tickets för den Fleger nich reken do.

Im Radio: Diesen Beitrag können Sie heute um 10.40 Uhr auf NDR 90,3 hören.

Im Internet: Alle Kolumnen zum Lesen www.abendblatt.de/platt und Anhören auf www.ndr903.de/programm/platt