"Schöne Bescherung!" Dor is nich öberlebert, wat Christoph Ahlhaus dacht hett, as he an'n 28. November vun de domolige Schoolsenotersch Christa Goetsch Bescheed kreeg, dat de Grönen de Koalitschoon platzen loot. Fast steiht ober, dat mit düssen Anroop nich blots för den Börgermeister dat Höpen op 'n besinnliche Wiehnachtstiet perdü weer. De Wählers speelt nu dat Christkind, un Bescherung is eerst an'n 20. Februar - Neewohlen!

De Hamborger Politik is siet den 28. November vull un ganz ut de Spoor flogen, Parteidoog mööt ploont, Toppkandidoten bestimmt, Wohllisten opstellt un Programme utklamüüstert warrn - un dat allens in'n Swiensgalopp, denn bet to'n 19. Januar mööt de Wohlvör-slääg för Börgerschop un Bezirksversammlungen amtlich op'n Disch liggen. Keen Wunner also, dat vör allen de böbersten Politikers de tokomen Fierdoog dorför nehmen warrt, sik vör den Wohlkamp noch 'n letzt Mol to verholen.

An'n nödigsten hett dat wiss Börgermeister Ahlhaus sülbst. Denn siet he sien Bontje an'n 25. August öbernohmen hett, gifft he sik Möh, sik de Hamborgers "vörtostellen", un dat deit he männichmol söben Doog in de Week un fohrt blots kott to'n Slopen no Huus. Un jüst em fallt dat Afschalten wiss an'n swoorsten, denn de 41-Johrige müsse erst vör Kotten den Dood vun sien Swiegervadder beklogen. Un dorüm bringt he de Wiehnachtsdoog mit de trurige Familie in Süddüütschland to.

Soziolsenoter Dietrich Wersich (CDU), he is, siet dat de grönen Regerungs-Liddmoten rutsmeten sünd, ok to'n tweten Börgermeister opstegen, hett Hamborg al an'n 17. Dezember Atschüüs seggt. He mookt Urlaub in'n Süden - in de Schweiz.

Besöök ut de Alpenrepublik kriggt op de anner Siet Herlind Gundelach (CDU). Se hett - ganz nee - nich blots dat Leit vun de Wetenschops-Behöörd man ok vun de Finanz- un de Ümwelt-Behöörd. Tohoop mit ehr Dochter, de in de Schweiz studeren deit, lett se sik Hilligobend Pasteten smecken. 'n Inkööpsbummel is ok fast inploont, ehr dat se an'n 29. Dezember wedder retour an'n Schrievdisch geiht.

Binnen- un Justiz-Senoter Heino Vahldieck (CDU) blifft de Fierdoog öber mit sien Familie in Hamborg. Bi jüm gifft't Fondue, ober ok dree "Plicht-Termine": Hilligobend will he je een Wach bi de Polizei un een bi de Füerwehr besöken, un an'n eersten Wiehnachtsdag steiht för den Handball-Fan - un "Sport-Senoter" - dat Spill vun den HSV Hamborg to Huus gegen Göppingen an.

Ok Kultur-Senoter Reinhard Stuth (CDU) freit sik op Wiehnachten "in'n Krink vun de Familie" un günnt sik 'n halv privoten, halv deenstlichen Termin: Mit sien Söhn kickt he sik de Philipp-Otto-Runge-Utstellung in de Kunsthall an - dat Ankieken vun de Biller vun den Romantiker is villicht 'n beten Balsam för em. Denn sien Weg trüch in de Kulturpolitik weer nich jüst romatisch.

An'n lockersten kann Wirtschops-Senoter Ian Karan de tokomen Weken op sik tokomen loten. De parteilose Ünnernehmer weer mit sien 71 Johr eerst in'n Sommer vun Ahlhaus in den Senot hoolt worrn un no de Wohl is sien kotte ploitische Karriere ok al wedder vörbi. Hilligobend geiht Karan in Wellingsbüttel no Kark un achteran stööt he un sien Familie mit 'n Glas Schampanjer op de Fierdoog an.

Vun SPD-Topp-Kandidoot Olaf Scholz weet 'n blots, dat he un sien Fro, de Börgerschops-Afgeordnete Britta Ernst, sik vör de Wohl noch 'n "Uttiet" genehmigt un de Fierdoog buten Hamborg tobringt.

'n root-gröne Koalitschoon mit GAL-Topkandidotin Anja Hajduk gifft't an Wiehnachten op jeden Fall (noch) nich. De Ex-Ümwelt-Senotersch fiert woll ok wiet weg vun Hamborg. Ober in ehr Öllernhuus in Duisburg koomt Öllern, Geswister, Neffen un Tanten weniger tohoop, üm öber Politik to snacken. Se wüllt Singen un Musik moken. Dorto gifft't traditschonell Goosbroden - antonehmen, dat de ökologisch groot worrn is.

Sungen warrt ok bi Katja Suding - ehr Söhns (acht un söss) wüllt dat so. Un wenn för Politprofis as Scholz un Hajduk Wohlkamp al 'n oles Leed is, so mutt de vörsehn Topp-Kandidotin vun de FDP düt Leed eerst noch lehren. Wat dat bedüden deit, bi de Elv-Liberolen, de sik traditschonell geern kabbelt, den Kopp ruttosteken, dat hett Suding al Moondagobend mitkregen. Op den Landesparteidag worr no ehr Reed woll höflich klatscht, man se kreeg ok Wind vun vörn. Wokeen ehr as "uns Topp-Kandidotin" beteken dä, de kreeg stantepe üm de Ohren haut, dat se nomineert, ober noch nich wählt weer. Dat schall an'n 4. Januar passeren un dat weer denn 'n passlich Geschenk to'n Geboortsdag - an'n 30. Dezember warrt Suding 35. Gelegenheit, de liberolen Gedanken uttotuuschen, gifft't al vörher. Denn an'n Moondag kemen 200 (!) Andrääg op Ännerungen un dorüm kunn dat Wohlprogramm nich besloten warrn. Nu mööt de FDP-Böbersten an'n 27. nositten. Vörher geiht ok Suding mit ehr Familie op Reisen - no de Öllern un Swiegeröllern no Vechta.

Dat Wohlkamp wat mit Verzicht to doon hett, dat hett Dora Heyenn to weten kregen. Egentlich wull se in'n Januar dree Doog mit de Kinner no Paris, doch nu is jüst to de Tiet de Parteidag vun de Linken, wo se as Topp-Kandidotin opstellt warrn schall. De Fierdoog verbringt de Frakschoons-Scheffin, de so geern Kunsthandwark mookt, in Hamborg mit Neihen, Püttjern, Koken - un denn probeert se traditschonell 'n nee'es Sellschopps-Spill ut.

Vörsehn is in't Huus Heyenn dütmol "Tactix". Dat is'n Wörpelspill un hett ok wat vun Schach. Dat geiht dorüm, de Figuren vun den Gegner ut't Feld to sloon un sik sülbst an jümehr Stä setten. Dat 'n dor glieks wedder 'n beten an Wohlkamp denken mutt, is woll nich to ännern.

Schöne Bescherung!