4330 Hamborger hebbt Hilligobend Geboortsdag. Abendblatt-Redaktörsch Geneviève Wood hett dree Christkinner dropen

Hamborg. Allens Gode to'n Geboortsdag! Een Dag, twee Feste. Hilligobend Geboortsdag to hebben, is wat ganz Apartes un 'n goden Grund, eenmol in't Johr glieks duppelt to fiern. De sülbst nich an Wiehnachten boren is, de hett männichmol Mitleed mit de Christkinner, denn de köönt sik eben blots een Mol in't Johr op 'n grote Höög freien.

De sülbst seht dat ober ganz anners un finnt dat besünners schöön, dat se an 'n so un so al fierlichen Dag op de Welt komen sünd. 12640 Hamborgers hebbt an de Wiehnachtsdoog Geboortsdag, 4330 Hilligobend. Dat hett dat Statistikamt Noord för dat Johr 2009 notellt. Dree Geboortsdagskinner vertellt, wat se an düssen Dag so mookt.

Miriam Anspreiksch steiht vörmiddags in de Mitt vun allens

De blonnen Locken, ehr fründlich Grientje. Miriam Anspreiksch ut Ellerau bi Quickborn süht 'n lütt beten so ut as dat Christkind geern moolt warrt. Dat passt, denn de 32-Johrige is ja ok een. Wenn 'n so will. Hüüt an'n Hilligen Obend warrt de Hotelfachfro so as jümmer in ehr Öllernhuus mit Frünnen ut ehr Kinnertiet kommodig brunchen un ehr Geboortsdags-Geschenke utpacken. Ober de Frünnen vun domols hebbt intwüschen ok Kinner un dorüm is de Runn mit bet to twintig Lüüd ganz schöön groot. De Vörmiddag höört alleen ehr to. Dat weer al jümmer so.

Fröher kemen de Öllern an't Bett vun jümehr Dochter un sungen ehr 'n Geboortsdagsleed, denn geev dat Koken, un denn müss de lütte Miriam natürlich de Karsen utpuusten. "As Göör funn ik dat bannig schöön, dat ik an'n 24. Dezember Geboortsdag harr, denn de ganze Dag höör mi to und dat keddelige Luern op de Bescherung full weg", seggt se.

As eenzigst Kind vun ehr Öllern dreih sik meist allens üm ehr.

Dat is nu anners.

An'n Nomiddag, wenn de Bescherung ansteiht, denn is de Geboortsdag ok al vörbi. Dor kann de grote Miriam ober goot mit leben. Denn nu dreiht sik dat üm 'n anner lütt Deern mit blonne Locken: üm ehr tweejohrig Dochter Linda. De harr - so weer dat berekent - egentlich an'n 26. Dezember Termin. Ober se wull denn doch eerst an'n 29. op de Welt. Een Christkind in de Familie langt ja ok.

Tibor Nadj un sien Söhn Niclas hebbt an den sülbigen Dag Geboortsdag

De 24. Dezember hett Traditschoon bi Familie Nadj. Denn Swiegermudder un Swiegerdochter harrn 'n ähnlichen Fohrploon. Tibor warrt an düssen Dag 37 Johr oolt. 27 Johr lang müss sik de Immobilienmakler ut Halstenbek sien Geboortsdag mit Jesus delen. Dat weer 'n schöne Tiet: "Ik weer eenzigst Kind un kreeg jümmer twee grote Geschenke. Een morgens, dat anner obends. Dat weer dat Wichtigste", seggt Vadder Nadj. As utwussen Minsch hett he jümmer al an'n Obend vörher in sien Geboortsdag rinfiert. Denn keem Niclas op de Welt - utgerekent Hilligobend, so as ok al sien Vadder. "Siet de Tiet fiert wi nich mehr rin", seggt Tibor Nadj.

Anners harr he 'n slecht Geweten, wenn he an'n annern Dag 'n dicken Kopp hett. Siet Niclas dor is, steiht he achter sien Söhn trüch. "Nu is he de Star", seggt Herr Nadj. De beiden Steenböck ("Wi sünd beide böös stuur", so de Vadder) deelt sik nich blots den Geboortsdag, man ok de grote Lust op Football. De Vadder in't Middelfeld bi Altno 93, de Söhn in de U 11-Mannschop vun St. Pauli.

Woans se Geboortsdag fiert? Bet Klock veer steiht de Döör bi Nadjs nich still. Frünnen un Verwandten fiert Vadder un Söhn. Öber to wenig Geschenken kann sik ok Niclas nich beklogen.

"He is 'n ganz feines Kind un locker, wat dat angeiht", seggt Vadder Tibor. An'n Obend warrt dat wat besinnlicher. Denn kümmt de ganze Familie tohoop un dat gifft 'n Oont to eten.

Niclas finnt dat super: "Ik mutt blots eenmol in't Johr jieprig luern", seggt he. Un denn weer jo ok den ganzen Dag öber al böös wat los un dorüm fallt dat Luern op de Bescherung weg. Verleden Sommer, as de Football-WM leep, dor dörf he sien Geboortsdag mit sien Frünnen richtig nofiern. Wenn't no Niclas geiht, denn mookt se dat tokomen Sommer wedder so. Villicht fangt so jo 'n nee'e Traditschoon an.

De lütte Christiane hett jümmer mehr Geschenken kregen as de annern

Bi Fro Rindchen ut Lokstedt is de Vörnoom Programm. Egentlich schull se Ursula heten. Man denn keem se veerteihn Doog to fröh op de Welt, un so worr dat ehr twete Vörnoom. Christiane heet se, wiel se eben an'n Hilligen Obend boren worrn is. De 78-Johrige is een vun 2200 Hamborgerinnen un 2110 Hamborgers, de an'n 24. Dezember Geboortsdag hebbt.

De fröhere Schoolmeistersch, de bet op Swömmen un Physik de Kinner meist allens bibogen hett, rüümt an düsse Stä ok glieks mit dat Vöroordeel op, dat Kinner, de Wiehnachten Geboortsdag hebbt, Mitleed verdeent: "Ik heff jümmer mehr Geschenken kregen as annern", seggt se un lacht dorbi. "De Verwandten dachen jümmer' dat arme Stackel vun Kind hett utgerekent Hilligobend Geboortsdag, dorüm geev dat besünners veel to'n Utpacken."

To ehrn Ehrendag hett ehr Mudder to Huus in Oostpreussen för Lütt-Christiane traditschonell griese Arfen mit sööt-sure Soos op 'n Disch bröcht. "Dat weer mien Lievspies", seggt Fro Rindchen. Al lang fiert Christiane Rindchen nu Johr för Johr in ehrn Geboortsdag rin. An'n 24. obends geiht dat denn no de Wiehnachtsfier no ehrn Söhn Gerd no Eppendörp.